الحضانه....الابتدائى....الاعدادى....الثانوى...الكليه

الواحد بقى عنده عشرين سنة .... اكتشفت كدة بس لما كنا بنكلم انا و اصحابى و فجأة لقيت نفسى بقولهم " ياااه انتو لسة فاكرين دة الكلام دة من 12 سنة ... و سكت و قلتلهم هو احنا بقينا نقول الكلام دة برضه؟؟؟؟ اللى هو بقاله سنين؟"


قعدت كدة اشوف الواحد عمل ايه فى دنيته ... 20 سنة مش قليلين برضه دة فى ناس بيتمنوا ثانيتين من اللى انا قاعد بكتب فيهم دلوقتى .. طب ايه عملت ايه ؟؟ اديك فى جامعة دلوقتى يعنى عديت حضانة و ابتدائى و اعدادى و ثانوى و الكلية قربت تخلص ( ان شاء الله يعنى :) ) .

قابلت ناس و عرفت ناس و ناس لسة قاعدة معاك و ناس مشيت و ناس اثروا فيك بكلمة و ناس زى ما جم زى ما مشيوا و ناس ياما قعدت معاهم و مش فاكر عنهم اى حاجة و لا حتى اشكالهم و ناس مش قادر تنسى ملامحهم ... ناس و ناس و ناس ياما شفنا ناس .....

و مش بس ناس دة كمان كان فى قرارات اتاخدت منها الصح و منها الغلط و منها اللى لسة مش عارف هعمل فيها ايه و منها اللى رجعت فيه لأكتشافى انه غلط و منها اللى اتعدل مع الوضع الجديد و منها اللى اتنسى لهيافته اصلا و منها اللى اتأجل .....

اكتشفت حاجات كتييير ... اكتشفت ان فى حاجات كتير عندى كنت بفتكرها من المُسَلمات فى حياتى و ان دة العادى يعنى لحد ما نزلت و شفت الناس عملة ايه فى الصعيد و ازاى ان انا باللى فى محفظتى دلوقتى دة اقدر اعيل اسرة كاملة هناك و مش هيحسوا بنقص .. اكتشفت ان فى اصحاب ميتعوضوشو الواحد يبقى عبيط بجد لو فرط فى حد منهم ... اتعلمت ان فى ناس مبتعرفش تعبر عن مشاعرها خالص و ان دة مش عيب فيها بالعكس اتعلمت ازاى ابقى عارف ان لو حد منهم اتنرفز عليا و بعدها بشوية كلمنى و عمل نفسه عبيط و كأن مفيش حاجة حصلت انى اعتبرها مكالمة اعنذار منه .....

ابتديت افهم الناس اكتر و بتديت افهم و اعرف نفسى انا كمينا اكتر و اقدر نفسى حتى لو الدنيا مش شايفة كدة .. ابتديت احس فجأة انى ماما :) و انى شخص يعتمد عليه يعنى لما حد من اصحابى بيبقى مضايق او فى مشكلة او فى حاجة مش عارف يتصرف فيها بييجى و يتكلم و يسألنى ... اكتشفت فجأة ان ربنا مدينى نعمة السمع يعنى حتى لو مش بعرف احل او اتكلم بس اهو ادينى بقعد اسمع الناس و هى متضايقة حتى سواقين التاكسى بيستغلوا الحتة دى :):) ... اكتشفت انى بعرف اسيطر على مشاعرى و كلامى الى حد كبير و ان مهما كلامى اللى ملوش معنى و تافه كتير الا انه فى اوقات كلامى بيطلع بحساب اوى و ببقى عامل حساب لكل حرف و كل لفظ ( دة الوقت الوحيد اصلاً اللى بعتبر نفسى اتكلمت فيه الباقى بعتبره طرطشة من بُقى و خلاص ) ... اكتشفت انى بعرف اصور و ييجى منى يعنى :) و انى بكره الامتحانات مع انى بحب الدراسة.

اكتشفت فجأة انى بجمع كتير اوى من المتناقضات فى بعض حتى فى اختيار اصحابى منهم المنظم اوى و منهم اللى عاقل بزيادة و منهم اللى مجنون و فى لحظة ممكن يقوللى انا مسافر بكرة و منهم الرومانسى و منهم و منهم المهم اكتشفت ان كل واحد منهم بيكمل جزء مش فيا يعنى من الاخر انا لا مجنون و لا منظم و لا عاقل بزيادة :) ... ذاكرتى انتقائية جداً فى حاجات كتيييير بعديها حتى لو لسة حاصلة بنساها و فى حاجات من سنين فاكرها بأدق التفاصيل.

مش هقولكم زى كل الناس انى زعلان انى كبرت بالعكس الواحد حس انه دخل فترة تانى من حياته و اهو لسة قدامه فرصة تانى الواحد يبدأ يعمل اللى كان نفسه يعمله طول العشرين سنة اللى فاته نفسى اوى اجيب كاميرا جديدة و يدونى اجازة من الجامعة عشان انزل اصور براحتى و بمزاج .. نفسى اسافر لكذا بلد فسحة يعنى نفسى اروح بيروت و دبى و سويسرا و لندن و استراليا ماليش نفس اروح امريكا خالص مش عارف ليه :) نفسى اتعلم فيولين اوى من زمان و انا نفسى فى كدة ... انا بس مستنى الفرصة و الوقت الفاضى :)


كان من المفترض انى انشر البوست يوم عيد ميلادى الرسمى لكن بما انه اتعملى النهاردة على غفلة و انا مش دريان فقلت دة الوقت المناسب ..... شكراً بجد يا احلى اصحاب.
تورتة لكل اللى عايز :):)

Christmas Countdown & MySpace Layouts

Custom Countdowns & MySpace Layouts

العلم نورن يا ولاد

حد يفهمنى الناس المسئولة عن التعليم فى مصر دول بيفكروا ازاى بس ؟؟؟؟؟ حد يقوللى ... وزير التعليم من فترة كدة قرر ( مش عارف ازاى ) ان التعليم يكون من خلال طريقة مصرية مفتكسة و هى ان الفصل يتجمع فى دواير ( شوفوا التطوير قالك دواير مش اى شكل هندسى تانى ) و كل دايرة يكون فيها تلميذ شاطر و الباقى فى الضياع و المدرس يدخل يشرح شفوى .. ايوة شفوى و التلميذ الشاطر يفهم الباقى انشاء الله ( شوفوا الحلاوة و الجمال ) .

تانى خبر و هو خبر لطيف جدا جدا ... وزير التعليم العالى هانى هلال قرر انه يرأس جامعة خاصة .

لو حد فهم حاجة من الناس دى يقوللى بس عشان متجننش و انا لسة فى عز شبابى .........

عندما يتحول الحب الى كلمات

تاكسى ....

من كام يوم ركبت مع سواق شاب قاللى رصد لأخر اخبار الشباب و طمنى على مستقبل الجيل كله الولد بصراحة ذوق اوى اوى و شكله كويس يعنى و لابس لبس حلو ، شافنى ماسك كام كتاب كدة و جايب قاموس للمطلحات السياسية جديد و شايل هيصة بقى ف بيقولى انت كلية ايه؟؟ قلتله السن قاللى عين شمس قلتله اه قاللى يا بختك .... قلت بقى هيقوللى انا مكملتش عشان اهلي و القصص المعتادة يعنى لكن صدمنى لما قاللى انا خريج حاسبات و معلومات السنة دى و مقدم فى كل حتة و ادينى شغال على التاكسى لحد ما تفرج. كفاية عليكم لحد كدة مع دة.

السواق التانى مش انا اللى ركبت معاه واحد صاحبى و لما نفد بجلده حى كلمنى ... قاللى الحق يا مينا انا كنت راكب مع راجل لسة قاتل مراته و عشيقها و معاة مطوة فى شرابه ، ايوة هو قاللى شرابه ... انا نفسى اعرف بس شافها ازاى .. هو غالباً شمها

اليكم المفاجأة بقى اخر سواق انا كنت لسة راكب معاة من ساعة جبلى عروسة .. و كان بيتكلم بجد اوىىى و كان هيتصل ياخد ميعاد عشان اقابلها.

حكايتى مع كاميرتى 3

مرض اسمه الغباء

c'est la vie .. c'est la belle dame sans merci

I saw pale kings and princes too
Pale warriors, death-pale were they all
They cried La Belle Dame sans Merci Hath thee in thrall

john keats

مجنون فى بلد العاقلين

مساء الخير انا واحد حكايتى زى معظمنا كدة عايش و بعيش .... الصعب انه لما الواحد يكتشف انه مجرد واحد فى الزحمة و انك بالنسبة لناس كتير مش موجود الا فى زحمتهم و محدش عارف ان لصورتك معانى تانية و لكلامك معنى تانية يعنى مين كا يعرف فى يوم ان ال " hiiiiiiiiii " اللى بتقولها دى اصلها فى العربى " اهههههههه " بس اللى يفهم .

على العموم قرار و اتاخد خلاص مش هعيش حزين دة انا هعيش سعيد على قد ما اقدر و هوزع سعادة على اللى حواليا كمان و اعتبرونى مجنووووووون ..... اااه انا مجنون فى بلد العاقلين

parle-moi d'amour

هل الحياة هى ان نحلم بها ؟؟؟ فها العاصفة كانت تنذر بوصولها فتهب ، و تمزق ثياب احلامى لتتركنى عرياناً ، ممدداً على فراشى ، كعاشق مشغوف بعشيقة لا وجود لها .

*******

كنت عطشاناً و كان قلبى بالاخص عطشاناً، يتوق الى هنالك ، الى العمق ، بل الى عمق الاعماق ، ابعد من اللحم و الدم ، الى تلك البلاد الخفية السرية ، التى اردت ان اقيس لا نهايتها و انا اقيس لا نهاية عطشى.

******

كنت اعيش ، و لكن كيف يواصل الانسان حياته و هو لا يعرف لماذا يعيش و كيف ينمى حياته؟؟؟

******

قال لى صديق " لا يمكنك ان تجد طريقك بنظرك الى نفسك . فأخرج من بيتك ! لأنك ان بقيت على الشاطىء ، فلن تدرك شيئاً من اليم الشاسع " و لكنى كنت افتقر الى بوصلة ، و ما كنت احسن الابحار.

******

مشيت فى الممر المعتم متحسساً طريقى : أما كان على ان اجتاز الليل لأدرك النور؟؟!!

******

كم من اناس يصمتون و هم ينغلقون على انفسهم فيتأملون ، فى حين ان اخرين يتكلمون ، فيلقون كلماتهم امام غيرهم و لكن ، فى اللحظة عينها يلقى غيرهم كلماتهم .... فتصطدم الكلمات و تسقط على الارضو تمحى.

******

انا اعلم امنه ان كان الكثير و الكثير من الشبان و الشابات ينفجرون غضباً ، و يريدون ان يأخذوا عنوة ما حرُموا منه فذلك لأنهم ولدوا نتيجة معانقة بالصدفة ، او لأن اهلهم الاطفال ارادوهم دمى ليس الا بعد ان نالوا السيارة و الكلب الصغير.

******

كان الحب لا يزال باقياً .... اما اليوم فهو شعلة تنطفىء ، فى حين ان ناساً عراة شفاهم مرتعشة و عيونهم ملتهبة يموتون من البرد و فى قبضتهم الجشعة حطام من هذا الشىء .. انهم يموتون ، ها هم رغم ذلك يصرون على تسمية ما يفعلونه حباً

******

michel quoist

غريب حالك!!

يوم ما جيت اتكلم لقيتك حاطط ايدك على بقى عشان منطقش و بعد كدة جى تضايق عشان مبتكلمش ؟؟؟؟؟

يوم ما باجى ابص بتقفلى عينى و بعد كدة بتزعل انى بتكعبل فى السكة معاك؟؟؟؟؟؟؟؟؟

يوم ما باجى امشى بتفضل ماسك فى و تزعل لما تلاقينى واقف مكانى؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

غريب حالك ؟؟؟!!!!!

حكايتى مع كاميرتى 2

جبرانيات

إذا قال الشتاء: إن الربيع في قلبي ,فمن يصدق الشتاء

إنما الشعر كثير من الفرح و الألم و الدهشة مع قليل من القاموس

قولك "إنَّك لا تفهمني" مديح لا استحقه انا و اهانة لا تستحقها انت

على هذه الشواطئ أتمشى أبداً بين الرمل و البحرإن المد سيمحو آثار قدمي و ستذهب الريح بالزبد أما البحر و الشاطئ ، فيظلان إلى الأبد ........

أنتم تشربون الخمر لتسكروا ، وأنا أشربها لأصحو من خمرةِ غيرها

ما أنبل القلب الحزين الذي لايمنعه حزنه على ان ينشد أغنية مع القلوب الفرحة

يغمسون اقلامهم في دماء قلوبنا ثمَّ يدَّعون الوحي والإلهام

لم يعمل البشرالا بمقتضى القول القائل "خير الأمور الوسط" لذلك تراهم يقتلون المجرمين والأنبياء.

إذا كنت لاترى إلاما يظهرهُ النور ، ولا تسمع إلا ما تعلنهُ الأصوات بالحقيقة لاترى ولا تسمع.

لايدرك أسرار قلوبنا إلا من امتلأت قلوبهم بالأسرار

أنت حر أمام شمس النهار ''''' وأنت حر أمام قمر الليل وكواكبه '''' وأنت حر حيث لا شمس '''' ولا قمر ولا كواكب '''' بل أنت حر عندما تغمض عينيك عن الكيان بكليته '''' ولكن أنت عبد لمن تحب لأنك تحبه '''' وأنت عبد لمن يحبك لأنه يحبك '

من مؤلفات العبقرى جبران خليل جبران

اليك انا رافع دعواى

لم اكن اعلم ان الغباوة اقسى من الهاوية


من التراب صنعنتى و لم اكن اعلم ان التراب قد دخل الى عقلى فلوثه


تقول لى انا امسك و اقول لك انت غدى و لم اكن اعلم ان حاضرى غائب


تركت اسمى و احببت الالقاب من قبله و لم اكن اعلم اسمك الا من خلال كلامى


تقول لى انت ابنى و اقول لك انت ابى و لم اكن اعلم اننى ما زلت اسكن فى ملجأ الحياة دون والد


من الف سنة كنت ما ازال فى فكرك و بعد الف عام سأظل هناك و لم اكن اعلم انك بالنسبة لى مجرد فكرة

لم اعرف الكثير الى الان و لم يدلنى الكثيرون لطريقى فلم اجد الا ان اقول: اليك انا رافع دعواى

لا مجال للعقل الليلة

لا مجال للعقل الليلة ... دعونا نفكر بقلوبنا و لو لمرة و لتكن الاخيرة و لكن فكروا .. اشعروا .. احيوا بقلوبكم.

فالقلب ليس مجرد اله لضخ الدم ... بل هو روح لضخ الحياة فى داخلنا ؛ فمن يخشى استعماله يكون قد حكم على نفسه بالموت او بالعيش دون هدف .. و ان تغير الاسم فالمعنى واحد و هو الضياع.

من لا يستخدم عقله قد ينقذه الاخرون من جهله و لكن من لا يستخدم قلبه يفر منه الاخرون لجهله.

من لم يستخدم قلبه فى حياته لن يعرف قيمته فى مماته.

من يستخدم قلبه سيصدق معنى الجنة عندما يسمع من طفل " الجنة فيها زحليقة كبييييييييييررررة "

ليه؟؟؟؟؟

ليه محدش بيهتم انه ييجى على نفسه شوية عشان يبسط الباقى ؟؟؟؟؟؟ ليه لازم واحد بس هو اللى يدفع التمن دة كل مرةةةةةةةةةةةةةة؟؟؟؟؟؟؟؟؟؟؟؟؟؟؟؟ ليه بس انا نفسى افهم؟؟؟؟ ليه لما حد يبقى عايز منك حجة يلبسلك قناع الاخوة و الحب و شيل الجميل ... و لما تحتاجه بتلاقى وشه فى قفاه؟؟؟؟؟ لييييييييييييييييهههههههههههههه ؟؟؟؟

مدام ( صلاح )

مساء الخير احب اعرفكم بنفسى انا ...... معتقدش ان اسمى مهم دلوقتى ، اسمى دلوقتى بقى زى اسمه " مدام صلاح " ايوة مدام ... بس لسة مدام طازة يعنى بقالى فترة مش كبيرة مش قادرة احكيلكم ازاى بحبه كدة اول ما شفته سحرنى .. مكونتش ببقى عايزة انام عشان مبطلش تفكير فيه و لما بنام بتمنى احلم بيه ... فى الاول كنت بشوفه كل اسبوع مرة بس لما بدأنا نتعرف على بعض ( غير انى اكتشفت انه عارفنى كويس ) بس بقيت اتلكك و اروح اقابله . المهم مش هنسى يوم ما جه يتقدملى ... هو انا مش عارف مين اللى اتقدم بصراحة هو انا و اهلى اللى روحناله البيت عشان نتقدم بس هو اللى جاب الهدايا . يوميها حبيته اكتر و لما لبسنا الدبلتين كنت حاسة ان كثافة جسمى اختفت و انى بدأت اطيير ، كان جوايا سعادة متتوصفش و مهما كتبت سطورى مش هتكفى كلام عنه و عن حبه و جنتلته . انا رايحة دلوقتى اجهز له الاكل عشان قرب ييجى عملاله النهاردة الاكلة اللى بيحبها .. مع انى لسة مستجدة فى المطبخ و معرفش حاجات كتيييير بس كفاية نظرته ليا و هو بياكل و مبسوط اوى باللى عملتهوله مع ان اوقات بصراحة بحس " ايه العك دة ؟؟!!!" بس هو بيحبه مش هنسى يوم ما الاكل شاط منى و جبت ديليفيرى بصلى و قاللى ايه دة؟؟ دة مش اكلك .... هو حلو منك بس انا بحب صنعة ايديكى انتِ و مسكلى ايدى و باسها قررت من يوميها انى احاول اطبخله اللى هو عايزه.

لسة فاكرة ايام خطوبتنا ايام ما كنت بستنى رسايله و كلامه .. لسة محتفظة بأول رسالة بعتهالى ( حبيبتى سمر .......) ياااااااااا مش قادرة اقولكو كنت ازاى سعيدة بحبه ليا اللى لسة بحسه معاه كل يوم و كأنه اول يوم نعرف بعض مش هنسى برضه فى فترة الخطوبة يوم ما زعلت منه عشان قراراته اللى فى اوقات كتير مش بفهمها و فضلت زعلانة منه و سبته و بدأت اغيظه و اغيظ نفسى بالاكتر بوقفتى مع (ادريس) شاب عجيب كدة ..... . مش هنسى يوم ما عدى عليا و لقانى وقفة معاه .. نظرته بس خلتنى احن و اضعف قدامه و يوم ما رجعتله برغم ندالتى معاه الا انه عمره ما مسكهالى زلة و كل ماجى اعتذر له يقوللى " على ايه " هو دة حبيبببيييي ياما ضحى عشانى ياما بهدلته معايا و ياما استحمل عشانى مش هقدر احكيلكو على كل حاجة بس كل اللى اقدر اقوله انى فخورة انى مدام ( صلاح ).

ورود الجناينى

دخلت جنينتى و قعدت اتفرج على اقسامها الغاية فى الروعة ... ما هو الجناينى بتاعى مقولكوش فنان ازاى مظبط الورود الحمراء فى جمب و البيضاء فى جمب ... لكن من ساعة ما اديته اجازة و بدأ قدام الورد الاحمر يطلع بنفسج و قدام الابيض يطلع اصفر الاول كنت مبهور بالشكل لكن دلوقت لما بدأ يخنق ورود الجناينى لقيت ان مفيش حل تانى غير انى انادى للجناينى تانى ........ يا جناايييييييييييييينيي

ضرفة شيش

ضرفة شيش .... كلنا زى ضرفة الشيش باينين للناس اننا واضحين جداً ماحنا نصنا فى الشارع فى الشمس منور علطول ... لكن اللى معظمنا مش شايفه هو ان النص التانى من جوة الاوضة الضلمة مخنوق بريحة حزن كريهة مقرفة و محدش عارف يوصل للقفل .. لأنه للاسف من جوة . و اللى يبانلك صاحب و حبيب هيجيله يوم و مش هيطيق ريحتك اللى طالعة من اوضتك ... افتح بيبانك و نضف ... خلى الشمس تنور فيها ، خليها تطرد الريحة و خيوط العنكبوت تدوٌُب و تخلى الحزن يهرب ما هو مفيش كابة من غير ضلمة و مفيش شيش من غير قفل .

شوية بجد .....

شوية صدق و حب بجد يعملوا احسن صداقة

شوية تضحية و حب بجد يعملوا احسن جوازة دايمة

شوية كلام بجد يعملوا احسن اتفاق ما بين اتنين

شوية مشاعر بجد يعملوا اكبر عملية هدم للحواجز ما بين اى اتنين

شوية ضحك من القلب بجد يعملوا احسن يوم ممكن تقضيه

شوية بجد من كل حاجة ممكن تقلب حياتك لأجمل حياة ..... بس تكون شوية بجد

تايهين فى بلاد الخرنوب

العدٌس شوية و يطيب .... طب اتفضل اشرب حاجة صيفى . طبعاً انتو بتقولوا ايه دة و دة كله عشان مبتعرفوش لغات ... دة صعيدى بمعنى ان العدس قرب يستوى و تعالى اشرب حاجة ساقعة . مش دة المهم انا هحاول اوصفلكوا على قد ما اقدر اللى شفته خلال 6 ساعات فى قرية اسمها ابوان فى المنيا . احنا ركبنا القطر و انا مبكرهش حاجة فى حياتى قد القطارات و بالاصح اى حاجة بتمشى على قضبان المهم ركبنا القطر بتاع 4 ساعات كدة و بعدين ركبنا مواصلتى المفضلة الا و هى الميكروباص لمدة لا تقل عن ساعة تانى عدينا فيها فى شوارع و شويرعات ( تصغير شارع D: ) و حارات و حويرات ( تصغير حارات ) و حوييرات ( اصغر من اصغر ممر ممكن تشوفه فى حياتك ) وصلنا لحتة كدة فيها حاجات ... ايوة حاجات لأن دول مش بيوت دول اماكن مفيهاش اى حاجة غير الهواء ايوة بجد .. المهم ان الناس مش بتشتكى و اعتقد انى عرفت سر الناس دى الناس دى بجد بتعرف تحب حتى الناس اللى عمرها ما شافتها فى حياتها ... احنا مجرد ان احنا عدينا قدام ( الاماكن ) اللى هما ساكنين فيها مسكوا فينا عشان يغدونا و اللى احتمال .... لأ مش احتمال هى دى فعلاً اخر لقمة موجودة فى بيوتهم انا متأكد 90000000000 % انى لو رحت المكان دة تانى ابسط حاجة ممكن تحصلى انى اتوه بس اللى بجد انا متأكد منه ان احنا اللى تايهين ايوة تايهين فى بلاد الخرنوب و بنحسد الخنازير على حبها الزايف لبعض لأننا حصرنا الحب كله فى علاقة ما بين ولد و بنت مش اكتر و لا اقل عشان كدة مبقيناش عارفين نعيش لأن الحب بقى مادة تدرس فى حصص الاحياء و ممكن اى حد يشوف الحب فى مشهد من فيلم لو حب . ايوة هو دة بقى الحب بتاع اليومين دول مع اننا مش محتاجين حاجة ... انا لو قلتلكو تعالوا نحرم الناس دى من حاجة بجد مش هلاقى حاجة لأنهم اصلا محرومين من كل حاجة بس بيعملوا اللى احنا عاجزين عنه و هو الحب ..

Mars attacks ولا ET

انتظروا mars attacks ايوة بجد او ممكن تصحوا الصبح تلاقوا ET فى حضنكوا صدقونى كدة .. حد منكم شاف فيلم junior بتاع ارنولد شوارزنيجر... اصل اللى شافه هيصدقنى لما اقول ان الافلام بقت حقيقة يعنى بعد كدة هتلاقوا مكتوب فى شريط الحياة " الاحداث مأخوذة من فيلم خيالى و التشابه فى الاسماء كان صدفة بحتة " الفيلم دة بيحكى عن راجل قرر انه يكون حامل بتجربة عملها على نفسه ، زى اللى حصل هنا بصوا هى الحكاية عويصة شوية توماس هو اصلا كان بنت "tracy " بس واضح ان الحكاية معجبتوش اوى فقرر انه يحول جنسه ( لحد هنا القصة عادية و سمعنا عنها قبل كدة كتير ) اللى مش عادى انه قرر يحتفظ بأعضائه التناسلية عشان كان نفسه يخلف لانه شايف ان دة حقه ببساطة

" he made the conscious decision to keep his female reproductive organs. "I wanted to have a child one day," he says. "I didn't know how. It was just a dream."Thomas says the desire to have children doesn't make him feel like less of a man. "I have a very stable male gender identity. I see pregnancy as a process, and it doesn't define who I am. It's not a male or female desire to want to have a child…it's a human desire," he says. "I'm a person, and I have the right to have my own biological child." اللى شدنى فى الحكاية دى غير ان الراجل حامل و بطنه كبيرة و فاضله 3 شهور و يولد ( ربنا ينتعه بالسلامة ) ان المجتمع هناك تقبل الحكاية بكل بساطة يعنى جيرانه متخضوش هما بس استغربوا واحدة من جيرانهم قالت

" Victoria says she was surprised—but not shocked. "Thomas told us that it was he that was pregnant," she says. "So it was more surprise that, 'Well, it's not Nancy? It's Thomas? Wait a minute. I have to get my head around this.'" تخيلت لو الحكاية دى كانت حصل فى مصر كان ممكن ايه اللى يحصل؟؟؟ و احنا لسة فى مجتمع مش عارف اذا مسح عرقه بأيده الشمال يبقى حلال و لا حرام !!! و قلت فى بالى اهو حلم البنت الصغيرة بتاعت فيلم الحفيد اتحقق " انا هخلى جوزى هو اللى يخلف " .
كل الحكاية دى كانت هتم من غير ما حد يعرف لانهم مكانوش ناويين يقوله لانه ببساطة حقهم هما لوحدهم لكن السبب الل خلاهم يقولوا

"We thought that it was best that we tell our story instead of other people telling the story for us," Nancy says.

بس كدة . يعنى بعد كدة ممكن اى ست مش عايزة تخلف ممكن تقول لجوزها هاتلى انت العيل ... و محدش يقوللى ازاى و منين .. اكيد من عند بتاع النونو .

حكايتى مع كاميرتى

انا كنت عايش .........

بعد كام سنة كدة كل واحد يمسك عياله و يعد يحكيلهم :
انا كنت عايش ايام ما كان البنزين بجنيه
انا كنت عايش ايام ما كان فى مواصلات بربع جنيه
انا كنت عايش ايام ما كان فى ربع جنيه اصلاً
انا كنت عايش ايام ما كان فى عيش بشلن
انا كنت عايش ايام ما كان فى عيش بخمسين قرش
انا كنت عايش ايام ما كان سندوتش الفول عند شبراوى بخمسين قرش
انا كنت عايش ايام ما كان فى ناس لسة بيشتروا بربع جنيه فول عند شبراوى من غير ما حد يقولهم مفيش بربع جنيه
انا كنت عايش ايام ما كان كيلو الطماطم بتمانين قرش
انا كنت عايش ايام ما كان فى اكياس مكرونة بجنيه و ربع
و من دة كتير بقى .... مش عارف ليه افتكرت مسرحية تخاريف ساعة ما كان محمد صبحى بيقول " اشتنى يمكن يغلى بعدين :)" ماما بتحكيلى بتقوللى انت عارف كيلو اللبن السايب اللى هو بيتباع بدبانه بقى بكام ؟؟؟؟ بقى بستة جنيه بتقوللى انا ايام ما اتجوزت مكنش فيه جهينة و لا الحاجات دى كنت بجيبه بستين قرش و علبة الزبادى كانت بعشرة قروش ... ضحكت و قلتلها طب كنت هاتى و حوشى اهم كانو نفعونا دلوقت .. قالتلى اههه انا غلطانة كنت المفروض احوش و قعدت تضحك.
دلوقتى اى كمسارى بيلم الفلوس عشان التذاكر بيقول كلمتين : تذاكر و انا اسف التذاكر غليت . و انا بحكى الكلام دة لواحد صاحبى قبل ما اكتبه قاللى طب انا هروح اكل بقى قلتله يلا روح الحقه قبل ما يغلى :).
افتكرت قصة جدو كان حكاهالى و مش بعيد تلاقوها بتحصل فعلاً " كان فى راجل فقير معهوش الا مليم ( لاحظوا ان القصة من ايام جدو) و كان كل مرة يعدى من قدام الكبابجى يشم الريحة و يبقى هيموت على حتة و فى مرة جاب رغيف عيش و قعد جمب الشواية و بقىبيغمس الرغيف بدخان الشوى .. يشوفوا الراجل صاحب المحل و يقوله انت بتعمل ايه؟؟؟؟ هات تمن اللى كلته قالله انا كلت هوا قال له ماليش دعوة .. الراجل الفقير قعد يدور فى جيبه لحد ما لقى عملة معدنية كانت نكلة باين ( محدش يسألنى يعنى ايه بس اعتقد انها تساوى ربع جنيه دلوقت :) ) المهم الراجل الفقير طلع العملة دى و خبطها على الرصيف فطلعت صوت و حطها فى جيبه تانى .. صاحب المحل : بتعمل ايه؟؟؟ قاله عادى انا كلت هوا و دفعتلك صوت" بس الحمد لله الناس دلوقتى قدامهم اختيارات كتيرة .. البطيخة دلوقتى ب 24 جنيه يعنى قدامك حلول كتيرة : يا تجيب بطيختين يا تروح تبدلهم بكيلو لحمة.

صباحك...يجيب السكر.

ابشروا العلاوة 30% و ابشروا كمان مرة البنزين زاد 35% يلا سمعونى احلى صوت .. واحد صاحبى قاللى امبارح على البنزين دة و مصدقتوش لأنى كنت سامع من كام يوم ان مفيش زيادات فى اسعار البنزين بس النهاردة و انا ماشى قلت افك الفلوس و بما ان اسهل مكانين فى مصر ممكن تفك منهم هما البنزينة و اى سواق ميكروباص و انا مكنتش ناوى اركب ميكروباص فُرحت داخل البنزينة لقيت يافطة متعلقة ( هى مش يافطة هى ورقة مكتوبة بقلم جاف عادى اوى و متشخبط عليها كمان ) مكتوب عليها الاسعار الجديدة بزيادات خرافية ما علينا كل دة عادى لسة ركبت التاكسى الراجل بيقوللى الشوارع نايمة من امبارح ... مفهمتش قلتله اههه امتحانات بقى ، لقيته بصلى و تقريباً كان بيقول فى سره ايه العبيط دة؟؟؟ قاللى البنزين زاد قلتله اهه ما انا لسة سائل فى البنزينة ( معرفش ايه العادة الجديدة اللى طالع فيها اليومين دول بسأل على اى اسعار و خلاص ) المهم و احنا ماشيين قاللى انا هبيع العربية لما انا كل يومين تلاتة كنت بدفع 50 جنيه بنزين دلوقت هضطر ادفع 85 جنيه ليه ؟؟؟؟؟؟ و انا بقبض كام خمسة و تمانين جنيه؟؟؟ قاللى يعنى انا اجيب بنزين و استلف عشان اكل يا عم يفتح الله صعب على اوى لانه شكله شاب ابن ناس يعنى قاللى طبعاً طالما البنزين غلى كل حاجة هتغلى على حسه قلتله انا سمعت من امبارح بس افتكرتها اشاعات لانى لسة سامع فى التليفزيون ان مفيش زيادة فى الاسعار بتاعت البنزين قاللى غالباً كان قصدهم مفيش زيادة فى الاسعار النهاردة و ضحك من همه و كملنا السكة و و نزلت انا و معرفش ايه اللى فكرنى بمقال قريته صاحبه كاتب " الحل لخفض اسعار زجاجة الزيت اذا كان اللتر بعشرة جنيه انهم يعملوا زجاجات نص لتر و تبقى بخمسة جنيه و بكدة نبقى قللنا النص ".

و ما زال الاعلام المهتم بأحوال الناس يناقش مشاكلهم بكل جدية متمثلا فى OTV و برنامجها الواقعى صباحك سكر زيادة اللى كل حاجة فيه بمبىىىىىىىىى و كل مشاكل الناس انهم ينفع يحطوا الورد الاحمر فوق الترابيزة و لا جمبها !!!!!!! بلاش الورد و لا فقرة " عزيزة اللذيذة " ...هى اسمها كدة ، فقرة تعليم رقص كنوع من المشاركة فى محو الامية المصرية قال يعنى هى دى الحاجة الوحيدة اللى ناقصنا تعليمها ... طب انا ظالم احكموا انتو النهاردة يعنى بعد زيادة الاسعار كانوا مستضيفين مييييييييييييييييين؟؟؟؟؟؟؟؟؟؟؟ واحدة اسمها شيرلى شلبى .. بتقولوا مين يا ولاد ؟؟؟؟؟؟؟؟ شيرلى شلبى و دى بتشتغل رائدة فن الاتيكيت فى الشرق الاوسط و اكن دى المشكلة الوحيدة اللى متحلتش فى الشرق الوسط و مقولكوش على التليفونات بقى .. ايه؟؟؟؟؟؟ واحدة اتصلت كل مشكلتها فى الحياة ان خطيبها بطل يفتحلها باب العربية و هى بتركب .... اخص عليه الوحش. انا بقترح يغيروا اسم البرنامج دة لصباحك يجيب السكر .

تيجى نشطب السطر كله و نبدأ من الأول؟؟

قعدت عادى زى اى يوم عشان اشرب ماج النسكافيه و قعدت اقلب فيه ... بصيت على احوال الناس و حسيت انى مش منهم .. مش عارف ليه حسيت كدة بس هو دة اللى حصل فضلت ماشى فى السكة و بسأل نفسى ليه وصلت لهنا و مين دول و العجيب ان كل الناس كانوا شبهى لدرجة لا توصف . لقيتنى و انا قاعد جمب رصيف السكة و مادد ايدى ليا و الغريب انى مهنش عليا حتى انى اقوله عايز ايه .... لقيتنى ماشى بعنتظة و عمال اشوط فى دة و دة و مش هاممنى حد ... لقيتنى واقف فى محل بيبيع بأسعار غالية و لقيتنى واقف فى نفس المحل مرتين تانى مرة بشترى و بيضحك على و انا بضحك و مرة و انا عمال ادعى على نفسى اللى بتبيع و مش راضية تأكلنى... لقيت نفسى واقف فى كنيسة بكلمنى و لقيت نفسى قاعد بسمع و مطنش و لقيتنى زهقان و خرجت و لقيتنى مشغول باللى فى ايدى ... لقيتنى عمال اشتكينى لنفسى و لقيتنى المحامى اللى قاعد يبررلى ... لقيتنى جارر نفسى على سجن و لقيتنى سجانه ... و فجأة لقيت واحد منى جى من بعيد و لقيته جه وقف جمبى .. قاللى ما تيجى نتكلم شوية مش عارف وقتها ليه حسيت انى سمعت الصوت دة قبل كدة !! و حسيت انى كنت خانقه لدرجة انه كان خايف يكلم و جه يسألنى الاول ، المهم سألنى سؤال " ايه رأيك فى اللى انت شفته؟؟؟" قلتله ايه القرف دة مكان كئيب و مع ان كلهم واحد الا انهم مش طايقين بعض و كل واحد عايز يموت التانى .. قاللى ايوة يعنى انت عجبك ؟؟ قلتله طبعاً لأ قاللى طب تعالى معايا.
فضلت ماشى معاه لحد ما دخلنى مكان ضلمة شوية قاللى طبعاً متعرفش ايه المكان دة ( حسيت وقتها انه بقى اقوى من ساعة ما شوفته و بقى يتكلم و كله ثقة فى نفسه ) بصراحة وقتها مش عارف ليه حسيت بخيبية و انى مش عارف اى حاجة دة انا حسيت انى ضعيف جداً قلتله ايه المكان دة .... و ليه ضلمة اوى كدة؟؟؟؟؟!!!! قاللى انت اللى مخليه كدة و ورانى صورة لمكان فى منتهى الروعة حيطانه حمراء و بيمر منه انهار نضيفة قلتله وووااااوووووووو ايه المكان دة ؟؟؟؟؟؟؟؟ سكت و وطى رأسه فى الارض مش عارف ليه بس حسيت بوجع جوايا .. و قلتله لأ متقلش اننا فى المكان دة .. اوعى تقول كدة. قاللى للأسف .. انت اللى عملت كدة انت اللى فضلت تملاه لحد ما بوظته ، انت اللى فضلت تطفى نوره اللى كان منور كل حاجة فيك ، انت ... ، و انت و انت لحد ما بدأت دموعى تنزل منى قاللى لأ متعيطش فى امل ، ايوة فى امل . تحب يرجع منور و نضيف زى الاول ؟؟؟ تحب متشوفش الناس اللى شفتها دى تانى؟؟؟ قلتله ياريت قاللى خد دة . و ادانى كتاب مفيهوش الا سطر واحد مكتوب .. كان مكتوب بخط حلو و فجأة لقيت فى نفس السطر خط مشدود اكن حد سحب القلم من اللى كان بيكتب و بدأ خطى انا يكتب فوقيه لكنه للأسف معرفش يكمل القديم لوحده و لا يكتب سطر جديد و فضل على نفس السطر يشخبط.. انا من الصدمة اتكسفت اقوله ان دة خطى مع انى كنت عارف انه عارف . قاللى تيجى نشطب السطر كله و نبدأ من الأول؟؟ سكت و قلتله ياريت و فجأة لقيت الدنيا بتدور بيا و اللى كان بيكلمنى اختفى و مفيش حاجة مسموعة من اصوات الناس الا سؤاله تيجى نشطب السطر كله و نبدأ من الأول؟؟ تيجى نشطب السطر كله و نبدأ من الأول؟؟ و لقيت نفسى لسة عمال اقلب فى الماج.

فى جنازتى لن اضطر للبكاء

عندما اردت ان ازيل وشم الدمعة من عينى ..... عندما اردت ان ارسم الابتسامة على شفاهى ..... عندما تكلمت و اظهر الجميع آذانهم و كأنهم يصغون .... عندما كشفوا لى عما بداخلهم. بدأ المى يفهم سبب وجوده. لا يريد احد الاصغاء فالكل يريد التكلم و يريدون مُنصِتين لكلماتهم دون ان يتخذوا يوماً دور المصغى لأىٍ من احاديثى. لطالما كانت امنياتى كلها تتلخص فى واحدة و اعتقدت انها ليست بمستحيلة و لكن ثبت لى العكس عندما اردت ان اُعامل بالمثل .
اوليس هذا هو زمن باراباس ؟؟؟؟ فالمجنى عليه يُجنى عليه بالاكثر و الجانى يتحرر . فعندما كنت قد تعودت على السكوت و التعامل مع احزانى على طريقتى قالوا لى " قل لنا حتى نتمكن من مساعدتك " و عندما تكلمت لم يكن احد يصغى او يكترث لما اقوله .... فقررت العودة لصمتى و كتمانى و تعلمت ان اسرارى و دواخلى انما هى لى وحدى و ليس من حق اى احد مشاركتى اياها . قررت ان ادع امواج نيرانى تلتهم افراحى وأدعو ان تسقط امطار العيون لتطفىء اللهيب المتصاعد و لكنها تأبى فتستسلم روحى للاحزان فتتعطف احياناً على عيناى فتقرر البكاء بقليل من الدمعات ثم تعود لحالها .و وجدت ان رثائى لحالى لن يجدى و تأكدت من انى لن اضطر للبكاء فى جنازتى.

كان اسمى امنياتهم.

تبدأ قصتنا فى بيت من الطبقة المنقرضة ... عفواً اقصد الوسطى و لكن ما الفرق فى التسمية ان كانت هتنقرض ، ما علينا ... عائلة مصرية مثالية مكونة من اب و ام و ولدين و بنتين ( يلا انشالله ما حد حوش :) ) الاب قاعد فى البلكونة و حزين اوى و واضح كدة ان الجو مكهرب فى البيت ... مراته مش طيقاه و كل ما تعدى تقوله: " ليه تعمل فينا كدة يابو العيال ؟؟؟؟؟؟؟؟ ليييييييهههههههه؟؟؟؟؟؟؟؟ " و تعد تعيط شوية و تعيد الحكاية تانى الولد الكبير مكنش قادر يسامح ابوه على عملته السودة فطفش و سابلهم البيت و محدش عارف هو راح فين لحد دلوقت ، الاخ الصغير لما لقى الدنيا بايظة خالص فى البيت و شاف اخوه ساب البيت من يأسه فى اصلاح الحال قرر انه يكون ايجابى و جه فى يوم بعد المسلسل بتاع الساعة 7 و قال لأمه و اخته اللى هى رقم 3 فى العيال ( انا نسيت اقولكم ان اخته التانية مش فاهمة اى حاجة لأنها لسة رضيعة و مش واعية ) انا قررت احاول اصلح اللى ابويا غلط فيه و هنزل و مش راجع غير لما القى حل ... الام اول ما سمعت كدة قالتله:"لأ يابنى متعملش فينا كدة كفاية اللى حصلنا" البنت ما صدقت و قالت ايوة يا ماما خليه ينزل و يجرب حظه ما هى بايظة بايظة ( غالباً مكنتش طايقة اخوها من اخر حركة عملها فيها) .... مش دى القضية دلوقت المهم الولد كانت الحماسة واخداه و المتهور نزل فعلاً و حاول يسترد مكانة بابه .... الناس اول ما شافته جى من بعيد بصوله كدة بأرف و عينيهم بتقوله ابقى قابلنى لو فلحت ... واحد من وسط الناس هو مطلعلوش لكن من بعيد كدة قاله " كان غيرك اشطر " و فضل الولد باصص على الناس و مكسوف من عملة باباه و بفكر و يقول فى باله " ربنا يسامحك يابا حد يعمل عملتك دى " . و يرجع الولد بنظره و يمشى وسط الناس رجالة و ستات و يزاحم .. مع انه مكنش عشمان فى انه يكون الاول بس محدش كان طايقه برضه. المهم الولد فضل ماشى ... ماشى ... ماشى و لا بيده :) لحد ما وصل لآخر الصف عشان ......... عشان .................. مش قادر اقولها ............ مضطر سامحونى .. عشان يجيب رغيف عيش .

بالمناسبة غلطة باباه انه زهق و طلع من طابور العيش :) :)

سؤال وجيه من انسان تافه؟؟؟؟

يا ترى كام واحد فى مصر شغلته على المدفع بُرررم..؟؟؟؟؟ من كام يوم كدة ماشى انا و واحد صاحبى و لقيته قاللى " تتصور انا نفسى اشتغل بقى" قلتله أههه يشتغل و يبدأ بقى يكون نفسه ( دة على اساس ان الواحد ممكن يكون لسة ليه نفس يجوز ). و بعدين بعد ما نزل قعدت افكر .. طب هو فى حاسبات و معلومات .... هيشتغل ايه فى مصر بعد الثورة التكنولوجية الرهيبة اللى حصلت فى البلد ؟؟؟ بس لقيت الاجابة سهلة لأن مراكز التكنولوجيا بقت فى كل حتة بللل كل شارع بللل كل ناصية .. ايوة كل ناصية فى نت كافيه و هيصوا بقى يا شباب حاسبات. واحد تانى فى اولى صيدلة فى جامعتنا العريقة جامعة عين شمس بس دة كان اسهل بكتير لأنه كان عارف طريقه من قبل ما يدخل الجامعة قاللى : " انا داخل صيدلة و هطلع منها بامبر مان اد الدنيا " ( بامبر مان فى الزمخشرى هو الانسان اللى بيقف يبيع بامبرز :) )
و فكرت كتير اذا كنا احنا كمان كام سنة و هنبقى خريجى كليات القمة على رأى الشعب المصرى و مش عارفين هنشتغل ايه؟؟!!! امال كام واحد فى مصر هتبقى شغلته على المدفع بُررم ؟؟

ذكريات صندوق زبالة.

القصة الجاية دى جديدة :) هحكيلكم على قصة صندوق من صناديق الزبالة اللى المفروض الحكومة حطاها عشان تنضف الشوارع.. ناهيكم عن ان الشركة مبيحللهاش انها تلم الزبالة الا و انا بنام ( دى شكليات ) انا هقولكم عن قصص بجد .

القصة الاولى : "قعدة عائلية تحت عامود" يمكن منكم اللى شاف الصورة المحطوطة ايام ما كنت حاططها عال فيس بوك تحت عنوان " كله يصوت يا عيال " مش دى مشكلتنا .... انا فى يوم من الايام لقيت الصندوق بتاع الزبالة محطوط و بينى و بينكو العامود اللى الصندوق محطوط تحته عامله جو رومانسيكى فظيع ، تيجى عائلة مكونة من اب و ام و عيلين ينزلوا من العربية اللى كان من الطبيعى انها تكون كارو و يقرروا انهم يتعشوا على ضوء الش... مش الشموع لكن الشارع . بس العجيب ان شكلهم كان فعلا مبسوط و مش مضايقين خالص ، بعكس ناس تانية بتبقى قاعدة فى احسن و اغلى مطاعم و على ضوء الش.. المرة دى الشموع و مش مرتاحين و مش مبسوطين و مش بينهم الحب اللى بين الناس دى.

القصة التانية: " دى مش زبالة بس ": يوم تانى معدى و كالعادة اى صندوق زبالة فى مصر بيبقى فيه زبالة و فايض زبالة و مدلدق لكن دة مكنش مدلدق زبالة بس دة كان فيه زبالة و ناس بتقلب فى الزبالة بتدور على اى حاجة ينفع تاخدها ... مين عارف بيعملوا بيها ايه؟؟؟؟ انا اعرف ناس بتاخد ورق السامبا دة و بتعلقه زينة فى بيوتها و الكراتين بتبقى اسقف ..... عشان محدش يشتكى من بيته بعد كدة.

القصة التالتة: "و غسلها فى مية المطر": عادة بييجوا اتنين قبل العربية بتاعت الشركة عشان العربية متجيش و توقف الشارع كتير ( مع انه كدة كدة بيقف ) . جه اتنين من الرجالة و خلصوا شغل و العربية لسة مجتش فواحد منهم و كان رجل عجوز لابس لبس الشركة الازرق دة فجأة لقيته قعد فى الارض و كان شتاء و الدنيا لسة ممطرة و الارض فيها مية من المطر ... كل دة عادى الرجل طلع من جيبه، و لا مش عارف لقاها و لا جابها منين بظبط ، حتة عيش باين و لا سندويتش مكنش باين اوى المهم الراجل العجوز بصلها كدة و قرر انه يغسلها ، او يسقى مش متأكد اوى هو كان عايز ايه ، و مسك حتة العيش و غسلها فى مية المطر و قعد ياكل لحد ما العربية جت قام و كمل شغله.

" ازاى متفاصلش فى ال 2 جنيه ".

كل سنة و انتو طيبين العيد داخل و موسم النضافة داخل من كل ناحية بيت و ناس و جيوب الناس. قررت انزل مع اصحابى نجيب هدوم و بصراحة انا اول مرة انزل مع اصحابى على طول كنت بنزل مع اهلى و احياناً قليلة اوى لوحدى لأنى بزهق بسرعة المهم 4 شباب زى الورد نازلين يشتروا هدوم متوقعين ان الحاجة عادى يعنى .... لكن الحاجة مكنتش عادى خالص الدنيا كانت بمبى بمبى بجد . انا مش مصدق الالوان لحد دلوقت بينك و روز و الوان عجيبة كدة معرفناش اساميها و كلها على رأى منى زكى " بربرق بربرق " خرجنا من المحلات الرجالى و احنا ماشيين و محدش كان جاب منا اى حاجة .. ولا شراب حتة. المهم مشينا و احنا ماشيين لقينا حتة

تى شيرت تحفة جامدة جداً و عجبتنا احنا اربعة لونها كان بنى غامق و بياقة و شكلها ولادى ولادى يعنى ملهاش حل و محدش منا احنا الاربعة اعترض عليها غير واحد قال :" يا جماعة دى غامقة اوى ".... عادى يعنى ، مخدناش فى بالنا اى حاجة المهم انا بكل براءة بقوله :"مش مشكلة نبقى نشوف الوانها " و خلاص بقى كلنا داخلين صوت موسيقى غامضة و احنا داخلين سلو موشن و فجأة صوت ييجى من ورانا ......

الصورة تقف و الوان سيبيا يعنى بنى كدة بس هى اسمها كدة فى التصوير احنا حتة محاولناش نشوف هو جى من مين " المحل دة حريمى بس يا شباب " و اتصدمنا و قعدنا نضحك غالباً الراجل افتكرنا بنستهبل بس بأمانة ال تي شيرت كانت جامدة اوى .... يعنى هما حطينلنا احنا الالوان العجيبة و الترتر و هما الحاجات دى .... طب ازاى ؟؟؟؟؟؟؟؟؟؟؟؟؟!!!!!!!!!!!!!!!!!! قلتلهم تلاقى البنات برضه بتعانى من انهم حطين حاجات ولادى اوى فى محلاتهم و مشينا و استكملنا رحلتنا للبحث عن اى حاجة ممكن تتلبس. انا عمرى ما طولت فى شراء هدوم زى النهاردة انا علطول ساعة و اقلب يعنى و بنجز. دة كله كوم و الاسعار كوم انا مش هكلم علينا طب احنا ولاد وحشين انا هقولكم بنت نازلة تشترى بادى عادى بتقولى سعره 1500 جنيه ... قولتلها " هاااااااااايل " قالتلى دة كمان بعد خصم 60% تخيل . بس لأ مش كل السعار وحشة فى واحد منا دخل محل و جاب تى شيرت ب 22.5 جنيه و فى الأخر بعد ما خلصنا و هيسنا اخر تهييس و و اتحطينا قدام الامر الواقع و اشترينا... اقل واحد دافع 160 جنيه و مجبش حاجة تقريباً و خلاص بنام يعنى كانت الساعة واحدة قلتله على فكرة انت اتضحك عليك " ازاى متفاصلش فى ال 2 جنيه ".

تصوير اندرو ابكار خريستو

MOST

كلنا معاك ......... لا طلاق

يتهيقلى مفيش حاجة تتقال بعد كدة " احنا مش مخيرين ..انا مقدرش احل حاجة تخالف الكتاب المقدس ، و هنفذ كلام الانجيل و ليحدث ما يحدث و لايوجد قانون على وجه الارض هيخلينا نخالف كلام الانجيل "

اتفرجت و دمى اتحرق.

امبارح اتفرجت على البيت بيتك قلت اشوف هيقولوا ايه عن حكاية الاضراب دى ....... و فعلا اتكلموا عن الاضراب بس الحياة كانت بمبى و كل حاجة كويسة و اتارى الناس هى اللى وحشة و مش راضية تاكل ..... اخس عليكم يا وحشين.... و الشباب هو اللى مش عايز يشتغل .. يا كوخة منك له . استغربت من ردود الناس لما سألوهم " ايه حكاية الاضراب دى ؟؟؟؟" واحد قال :( اوشاعات ) و واحدة قالت لأ مفيش حاجة عادى و جابو طالب جامعى كدة قال انا حضرت سكشن فيزيا و سكشن مش عارف ايه تانى كدة و كان ناقص يقولنا جدوله ..... استغربت جدا من ردود الناس و اكن الحياة جميلة. طب انا مش مع ان الناس تعمل اضراب لكن بينكروا الحالة السودا اللى هما فيها ليه؟؟؟؟؟؟؟؟؟؟؟؟؟؟؟؟؟؟ و ملقتش حاجة اقولها غير خلوا البيت بيتك يأكلكوا بقى .... و قفلى على كل المواضيع.

اهو لسة رخيص ب 3 جنيه بس .

من كام يوم كدة روحنا هند بتاع الكشرى و كان من الطبيعى جدا اننا نطلب كشرى لكن اللى مش طبيعى انى الاقى اسعار الاطباق اتغيرت كليا ......... بعد ما كان فى طبق بجنيه و غلى بقى بجنيه و ربع دلوقت اختفى و بقى بقدرة قادر ب 3 جنيه ما علينا قلنا مش مشكلة ماحنا كدة كدة كنا بنجيب 3 صغير عشان يادوب نشبع . فى يوم تانى راكب تاكسى فى امان الله و رايح الكنيسة عادى يعنى ... ركبت معايا ست غلبانة قعدت تدعى للسواق و كدة المهم شوية و لقيتها بدأت تكلم نفسها و تدعى قلت فى بالى هى مالها قلبت على السواق فجأة كدة ليه؟؟ شوية و لقيتها بتكلمنى انا و بتقولى شوفت يابنى كيلو الفاصوليا اللى محدش بياكلها بقت ب 8 جنيه و القوطة ب 5 جنيه . سكت و معرفتش ارد عليها بصراحة ....... و فى يوم كدة قررت انزل اشوف حاجة .. طقت فى دماغى اشوف ايه اخبار الدقيق بعد ما الرغيف بقى ب 50 قرش روحت للراجل بقوله "هو شوال الدقيق بقى بكام دلوقت؟" ... و مكملتش كلمتى و لقيته اتحرق اوى كدة و قاللى بقى ب 220 جنيه و قال حاجات تانى بس انا كنت من الصدمة مش مصدق. المهم قررت انزل اشوف بقية الاسعار و اليكم النتيجة : كيلو الفول زاد النهاردة بظبط ربع جنيه عن اخر زيادة من اسبوعين و بقى ب 8 و ربع و فى ب 9 مش عارف ايه الفرق ...... العدس الاسود ب 7 و نص ..... كيس المكرونة زاد الضعف مع نفس الكمية و بقى ب 2 جنيه و نص زجاجة الزيت عباد الشمس بقت ب 12 جنية و الحمد لله بزيادة 5 جنيه من شهرين و واحد قاللى "دة حتة زيت التموين اللى هو مالوش اسم اصلا زاد 4 جنيه" و لمحبى شبراوى ، سندوتش البطاطس زاد سعره و بقى ب 2 جنيه و ربع .......... انا بقول نقضي بقية حياتنا موز و اهو لسة رخيص ب 3 جنيه بس .

بيشترى ب 100 جنيه فاكهة ..... لعلمك دى اخر 100 جنيه

محدش يستغرب من اللى هيقراه ... صدقونى الموقفين حصلوا فى مصر مش فى حتة تانية.
هما مشهدين و مش مناطق مختلفة او عشوائية دول فى منطقتين من ارقى مناطق مصر على حد علمى يعنى.
المشهد الاول:مصر الجديدة بالتحديد قدام فندق بيروت فى شارع بيروت اللى يعرف منكم المنطقة يعرف ان فى فكهانى هناك واقف علطول .... عربية شيك تهدى ينزل منها رجل عادى جدا ميبنش عليه اى حاجة نزل زى اى واحد نازل لفكهانى يجيب فاكهة شوية موز على شوية تفاح و كدة و لسة هيدفع عشان يحاسب ..... طلع من جيبه 100 جنيه ان ان ان اهههههه ييجى من وراه راجل و يمسك ال 100 جنيه ( مش حرامى .. اصل انا افتكرت كده برضه ) المهم بعد ما مسك ال 100 جنيه زعق اوى كدة و هو زعلان و محروق " بيشترى ب 100 جنيه فاكهة و انا مش لاقى ااكل العيا ل" مش حقد لكن وجع.يمشى صاحب ال 100 جنيه و وشه فى الارض و ساب الفاكهة مكانها طبعا لأنه كان اتسمم من واقع الرجل التانى حطوا تفسكوا مكانه و شوفوا .... الراجل اخد ال 100 جنيه و هو مكسوف هيعيط .... الفكهانى ....... الفكهانى .. محدش قاللى احساسه ايه؟

المشهد الثانى:مارينا فى يوم صيفى مشمس جميل معتدل و الهواء يجنن و فظيع ..... عيل صغير جى جرى على باباه " بابى بابى "الاب:"نعم" و شكله اضايق من ابنه. الولد:"هات فلوس عايز اشترى حاجة" هو مقالوش حاجة دة انا اللى مش فاكر ايه هى الحاجة ، المهم الاب لسة برضه شكله مضايق من ابنه وابتدى يزعق بقى " انت مش لسة مشترى .. هو كل شوية ، لعلمك دى اخر 100 جنية النهاردة "