عدت عادى على صاحبتها الصيدلانية اللى كانت متعودة تروحلها كتير تسلم عليها بس المرة دى كانت زيارة مختلفة كانت زى ما بيقولوا كدة زيارة رسمية دخلت (م) و معاها روشتة .... بعد السلامات و القبلات لاحظت الصيدلانية هدوء غريب . مالك يابنتى ؟؟؟ ماليش ، و مدت ايديها بالروشتة . اخدتها و بصت فيها و راحت عشان تجيب الدواء و هى مش واخدة فى بالها و هى بتقول ياااااا دة دوا تقيل اوى دة لمين دة يا (م) ؟؟؟ دة ليا انا ...... صمت غريب يسود المكان يقطعه طفل صغير داخل متعور فى ركبته من العجلة الصمت لسة سيد الموقف يخرج الولد و تبدأ صديقة (م) بالكلام انت عارفة الدواء دة بتاع ايه؟؟؟؟؟؟ نظرات متبادلة مباشرة فى العيون .. دة بتاع لوكيميا . (م) : ما انا عارفة . من امتى؟ مش من بعيد لسة الصبح ؟ طب و الدكتور قالك ايه؟ ..... . تاخد الدواء و يحضنوا بعض مع شوية دموع و تخرج (م) . و لأول مرة تتمشى فى الشارع باحساس مختلف حسة انها مش خايفة ماشية و هى بتفتكر كل حتة من الشارع ... هنا كانت من كام سنة بتقف تستنى اوتوبيس المدرسة و الكشك دة ياما جابت منه حاجات حلوة و لما كبرت شوية بدأت تقف على محطة الاوتوبيس اللى جمب بيتهم و افتكرت ازاى اتعرفت على صاحبتها من الوقفة بتاعت المحطة افتكرت ايام الكلية و المكتبة اللى ياما راحت تصور من عندها ورق .... روحت البيت و بدأت تدور فى صورها القديمة على كل الذكريات القديمة و لأول مرة بتحس ان للكاميرا بتاعتها قيمة غالية اوى ... الصور دى كلها كانت محاولة منها لتوقيف الزمن . وقفت ( م ) قدام كل صورة و عاشتها من اول و جديد ...... ميرسى يا بابا الفستان يجنن .. يلا يا جماعة الفصل كله ييجى عشان الصورة اضحكى يا بنتى ساى تشيييييييييييييز .... سنة حلوة يا جميييييييل سنة حلوة يا جميييييييييييييل سنة حلوة سنة حلوة سنة حلوة يا جمييييل ... . يااااااه كل الذكريات دى .
