ضرفة شيش

ضرفة شيش .... كلنا زى ضرفة الشيش باينين للناس اننا واضحين جداً ماحنا نصنا فى الشارع فى الشمس منور علطول ... لكن اللى معظمنا مش شايفه هو ان النص التانى من جوة الاوضة الضلمة مخنوق بريحة حزن كريهة مقرفة و محدش عارف يوصل للقفل .. لأنه للاسف من جوة . و اللى يبانلك صاحب و حبيب هيجيله يوم و مش هيطيق ريحتك اللى طالعة من اوضتك ... افتح بيبانك و نضف ... خلى الشمس تنور فيها ، خليها تطرد الريحة و خيوط العنكبوت تدوٌُب و تخلى الحزن يهرب ما هو مفيش كابة من غير ضلمة و مفيش شيش من غير قفل .

شوية بجد .....

شوية صدق و حب بجد يعملوا احسن صداقة

شوية تضحية و حب بجد يعملوا احسن جوازة دايمة

شوية كلام بجد يعملوا احسن اتفاق ما بين اتنين

شوية مشاعر بجد يعملوا اكبر عملية هدم للحواجز ما بين اى اتنين

شوية ضحك من القلب بجد يعملوا احسن يوم ممكن تقضيه

شوية بجد من كل حاجة ممكن تقلب حياتك لأجمل حياة ..... بس تكون شوية بجد

تايهين فى بلاد الخرنوب

العدٌس شوية و يطيب .... طب اتفضل اشرب حاجة صيفى . طبعاً انتو بتقولوا ايه دة و دة كله عشان مبتعرفوش لغات ... دة صعيدى بمعنى ان العدس قرب يستوى و تعالى اشرب حاجة ساقعة . مش دة المهم انا هحاول اوصفلكوا على قد ما اقدر اللى شفته خلال 6 ساعات فى قرية اسمها ابوان فى المنيا . احنا ركبنا القطر و انا مبكرهش حاجة فى حياتى قد القطارات و بالاصح اى حاجة بتمشى على قضبان المهم ركبنا القطر بتاع 4 ساعات كدة و بعدين ركبنا مواصلتى المفضلة الا و هى الميكروباص لمدة لا تقل عن ساعة تانى عدينا فيها فى شوارع و شويرعات ( تصغير شارع D: ) و حارات و حويرات ( تصغير حارات ) و حوييرات ( اصغر من اصغر ممر ممكن تشوفه فى حياتك ) وصلنا لحتة كدة فيها حاجات ... ايوة حاجات لأن دول مش بيوت دول اماكن مفيهاش اى حاجة غير الهواء ايوة بجد .. المهم ان الناس مش بتشتكى و اعتقد انى عرفت سر الناس دى الناس دى بجد بتعرف تحب حتى الناس اللى عمرها ما شافتها فى حياتها ... احنا مجرد ان احنا عدينا قدام ( الاماكن ) اللى هما ساكنين فيها مسكوا فينا عشان يغدونا و اللى احتمال .... لأ مش احتمال هى دى فعلاً اخر لقمة موجودة فى بيوتهم انا متأكد 90000000000 % انى لو رحت المكان دة تانى ابسط حاجة ممكن تحصلى انى اتوه بس اللى بجد انا متأكد منه ان احنا اللى تايهين ايوة تايهين فى بلاد الخرنوب و بنحسد الخنازير على حبها الزايف لبعض لأننا حصرنا الحب كله فى علاقة ما بين ولد و بنت مش اكتر و لا اقل عشان كدة مبقيناش عارفين نعيش لأن الحب بقى مادة تدرس فى حصص الاحياء و ممكن اى حد يشوف الحب فى مشهد من فيلم لو حب . ايوة هو دة بقى الحب بتاع اليومين دول مع اننا مش محتاجين حاجة ... انا لو قلتلكو تعالوا نحرم الناس دى من حاجة بجد مش هلاقى حاجة لأنهم اصلا محرومين من كل حاجة بس بيعملوا اللى احنا عاجزين عنه و هو الحب ..